Një aksident i rëndë trafiku është regjistruar mbrëmjen e sotme në rrugën “Plasticharska” në Shkup.
Rreth orës 22:40, një veturë dhe një motoçikletë janë përplasur fuqishëm, ndërsa si pasojë drejtuesi i motoçikletës ka pësuar lëndime të rënda.
Sipas informacioneve të para, menjëherë pas aksidentit në vendngjarje kanë mbërritur ekipet e Ndihmës së Shpejtë, të cilat e kanë transportuar të lënduarin në Spitalin e Qytetit, ku po merr trajtim intensiv mjekësor. Gjendja e tij shëndetësore ende nuk është bërë zyrtarisht e ditur.
Policia ka bllokuar pjesërisht segmentin rrugor dhe ka nisur hetimet për zbardhjen e rrethanave të aksidentit.
Në vendin e ngjarjes janë vërejtur pjesë të shpërndara të motoçikletës dhe veturës, gjurmë frenimi dhe dëmtime të mëdha në të dy automjetet, që dëshmojnë për fuqinë e përplasjes.
Fotografitë dhe pamjet e siguruara nga ALSAT flasin vetë për përmasat e aksidentit. Motoçikleta shihet pothuajse e shkatërruar, ndërsa pjesa e përparme e veturës ka pësuar dëme të konsiderueshme. Shumë kalimtarë janë mbledhur në vendngjarje, të tronditur nga ajo që kanë parë.
Vetëm pak ditë më parë, unaza e Shkupit ishte vendi i një tragjedie të rëndë ku humbën jetën katër persona, ngjarje që tronditi opinionin publik dhe riktheu debatin për kujdesin në komunikacion dhe sigurinë rrugore.
