Një nga krimet më të rënda të viteve të fundit ka tronditur opinionin publik në Austri dhe Ukrainë. Viktimë e ngjarjes është Danylo K., 21 vjeç, student në Vjenë dhe djali i nënkryetarit të bashkisë së Kharkivit.
Ngjarja ka ndodhur në lagjen Donaustadt të Vjenës, ku shërbimet zjarrfikëse, pas një alarmi për zjarr, kanë gjetur një automjet Mercedes të zi të djegur plotësisht. Në sediljen e pasme të mjetit është zbuluar trupi i pajetë i të riut.
Sipas hetimeve paraprake të policisë austriake, viktima ishte sulmuar fillimisht në një garazh nëntokësor pranë hotelit “Sofitel”, ku dyshohet se është dhunuar rëndë nga një bashkëstudent. Më pas, ai është futur me forcë në automjetin e babait të tij dhe është mbajtur peng për disa orë, gjatë të cilave është keqtrajtuar.
Pas kësaj, autorët e kanë transportuar automjetin në rrugën Marlen-Haushofer-Weg, ku i kanë vënë flakën me benzinë, duke e lënë viktimën brenda. Autoritetet konfirmojnë se dy bidona me karburant ishin blerë pak para ngjarjes, fakt që tregon se vepra penale ishte e planifikuar paraprakisht.
Familja e 21-vjeçarit kishte humbur kontaktet me të që më 25 nëntor dhe kishte njoftuar autoritetet pasi vuri re se dy portofolet e tij ishin zbrazur. Ky detaj ka përforcuar dyshimet se motivi kryesor i krimit lidhet me grabitjen e kriptomonedhave, me vlerë të konsiderueshme financiare.
Edhe pse autoritetet nuk kanë bërë publike shumën e saktë të parave të vjedhura, dyshohet se bëhet fjalë për shuma të mëdha. Dy persona të dyshuar, shtetas ukrainas të moshave 19 dhe 45 vjeç, janë shpallur në kërkim ndërkombëtar dhe janë arrestuar në Ukrainë. Gjatë ndalimit, atyre iu gjetën sasi të konsiderueshme parash në dollarë amerikanë, çka ka ngritur dyshime se kriptomonedhat janë konvertuar menjëherë në para fizike.
Hetimet po vazhdojnë në bashkëpunim mes autoriteteve austriake dhe atyre ukrainase për zbardhjen e plotë të rastit.
