Presidenti amerikan Donald Trump deklaroi se do ta shtyjë afatin e 6 prillit për Iranin që të arrijë një marrëveshje për ndalimin e luftës, ose të përballet me shkatërrimin e objekteve të tij energjetike, duke thënë se bisedimet po shkojnë “shumë mirë”. Megjithatë, Teherani e ka hedhur poshtë propozimin amerikan si të padrejtë.
Lufta katërjavore është përhapur në Lindjen e Mesme, duke vrarë mijëra njerëz dhe duke goditur ekonominë globale me rritje të madhe të çmimeve të energjisë, çka ka nxitur frikën për inflacion global.
Më 28 shkurt, SHBA dhe Izraeli nisën sulme ndaj Iranit pasi bisedimet për programin bërthamor të Teheranit nuk arritën marrëveshje.
Të enjten, gjatë një mbledhjeje të kabinetit në Shtëpinë e Bardhë, Trump u kërcënua se do të rrisë presionin ndaj Iranit nëse nuk arrihet një marrëveshje. Më vonë, ai publikoi në rrjetet sociale se do të pezullojë kërcënimet për sulm ndaj objekteve energjetike të Iranit për 10 ditë, deri më 6 prill.
“Bisedimet janë në vazhdim dhe, pavarësisht deklaratave të gabuara të mediave për lajme të rreme dhe të tjera, ato po shkojnë shumë mirë”, shtoi ai në një postim në Truth Social.
Irani deklaroi se nuk është i përfshirë në bisedime me Uashingtonin, ndërsa Trump nuk specifikoi me kë po negocion SHBA në Iran, ku shumë zyrtarë të lartë kanë humbur jetën gjatë luftës.
Më 23 mars, Trump njoftoi ndërprerjen e të gjitha kërcënimeve për sulm ndaj termocentraleve dhe infrastrukturës energjetike për një periudhë prej pesë ditësh, por kjo periudhë tani është zgjatur në 10 ditë.
Irani nuk ka kërkuar një pauzë 10-ditore për sulme të tilla, raportoi “Wall Street Journal”, duke cituar ndërmjetës në bisedimet për paqe.
Trump deklaroi për “The Five” në Fox News se iranianët kanë kërkuar një shtyrje shtatëditore të sulmeve ndaj objekteve energjetike. Teherani nuk reagoi menjëherë.
Irani ka paralajmëruar se do të kundërpërgjigjet ndaj objekteve energjetike në rajonin e Gjirit nëse Trump realizon kërcënimet e tij.
Perspektiva e sulmeve hakmarrëse ndaj infrastrukturës civile mund të trondisë edhe më shumë tregjet globale dhe të rrezikojë jetesën e miliona civilëve në rajon, të cilët varen nga energjia elektrike për furnizimin e qyteteve dhe ujin e pijshëm.
