Во еден дел на Европа четири месеци не се стемнува

Овој природен феномен се случува во Норвешка помеѓу 20 април и 22 август секоја година поради навалувањето на оската на Земјата, пренесе ЛедБајбл. Во овој период сонцето не заоѓа под хоризонтот, туку постојано кружи од едната до другата страна на небото, а во подрачјата под влијание на оваа појава се одржуваат бројни фестивали и разни активности како што е полноќен голф.
Неверојатни глетки може да се видат во областите блиску до Арктичкиот круг, како што се Финмарк, Тромс, Лофотен и Вестеролен, Хелгеланд, Бодо и Салтен, но вистинската магија се случува во Свалбард, регионот со најдолги периоди на полноќно сонце.
Тоа е група на острови во Арктичкиот Океан лоцирани приближно на половина пат од Норвешка до Северниот Пол. Таму сонцето непрекинато сјае во текот на целото лето, што го прави архипелагот дестинација од соништата за љубителите на фотографија. Покрај тоа, архипелагот е најголемото живеалиште за поларните мечки и многу туристи избираат да истражуваат пооддалечени острови и да набљудуваат диви животни.