Australianja Georgie Ball është bërë virale në rrjetet sociale pasi fustani i saj u gris gjatë një feste dasme në Mudgee, teksa po performonte një koreografi të përgatitur paraprakisht.
Fizioterapistja 28-vjeçare nga Newcastle ishte e ftuar në dasmën e shoqes së saj më të mirë, Ellie, dhe së bashku me vëllain e saj kishin përgatitur një hyrje koreografike për pritjen e dasmës. Megjithatë, performanca përfundoi në një moment të pakëndshëm, por për publikun dhe të pranishmit mjaft argëtues.
Videoja e incidentit ka marrë mbi 8.4 milionë shikime në rrjetet sociale.
Sipas vetë Georgie, problemet kishin nisur që gjatë provave para ceremonisë. Gjatë përpjekjes për të bërë një rrotullim dhe lëvizjen e njohur “worm”, ajo kishte ndjerë se fustani kishte filluar të çahej.
Edhe pse miqtë e kishin siguruar se bëhej fjalë për një dëmtim të vogël, çarja në pjesën e pasme ishte zgjeruar deri në rreth 30 centimetra para fillimit të festës.
“Unë i thashë vëllait tim se nuk mund të bëja rrotullim sepse fustani do të grisej plotësisht, por do të provoja lëvizjen ‘worm’,” ka deklaruar ajo.
Megjithatë, fustani u gris para se të realizohej lëvizja, duke krijuar një situatë të sikletshme në mes të dasmës, e cila më pas u shndërrua në një video virale në internet.
